Mart ayında Akif Əlirza oğlu Hüseynovun 70 yaşı tamam oldu. Bunun təxminən 60 ilini sevimli işinə – təsviri  incəsənətə, 40 ilini gənc rəssamların hazırlanmasına həsr etmişdir.

O, pedaqogika üzrə fəlsəfə doktoru, dosent və Azərbaycan Rəssamlar İttifaqının üzvüdür.

1989 – cu ildən Gəncə Dövlət Universitetinin təsviri incəsənət kafedrasında  işləyir.  Onun 600 –dən artıq mənzərə, yüzlərlə natürmort əsərləri  var. Bu görkəmli  fırça ustası bir çox dəyərli portret əsərlərinin də müəllifidir.

Bu portretlərin qəhrəmanları bizim müasirlərimiz, həkimlər, müəllimlər, şairlər, alimlər və qəhrəmanlardır.

Akif Hüseynov  dərs dediyi  tələbələrə rəngkarlıq fənni üzrə akvarel və yağlı boya  ilə işlənmə texnikasının incəliklərini öyrədir.

Akif müəllimin  sənətini rəssamlıq korifeyləri Mikayıl Abdullayev, Tahir  Salahov, Səttar  Bəhlulzadə və A.P.Xolmoqorov çox yüksək  qiymətləndirmişlər.

1980 – ci ildə Ümummilli liderimiz Heydər Əliyev Gəncədə olarkən rəssamlıq sərgisində  iştirak etmiş və Akif Hüseynovun əsərləri ilə  maraqlanmışdır.

Akif müəllimin “Kəpəz. Göy – göl” adlı əsəri yağlı boya ilə işlənmiş  2001 – ci ildən Böyük Britaniya Təhsil Nazirliyinin muzeyində saxlanılır və nümayiş etdirilir.

Şəhər tədbirləri ilə əlaqədar olaraq şəhər rəhbərliyi tərəfindən Akif müəllimə  məsul tapşırıqlar verilir. Belə ki, onun portret  əsərləri (Nizami Gəncəvi, Məhsəti Gəncəvi, Mirzə Şəfi  Vazeh) şəhərimizin meydan və küçələrini bəzəyir.

Yetmiş yaşı olmağına baxmayaraq o, pedaqoji və sənət axtarışlarını davam etdirir. O öyrədir və həm də özü öyrənir. Onun insan və rəssam  kimi gücü məhz bundadır.